الاكتئاب ( أسبابه _ أعراضه _ علاجه )

الإكتئاب دلوقتي بقي من اكتر الحاجات اللي الإنسان بيمر بيها وخاصه في ظروف زي اللي احنا فيها دي وقعدة البيت.

في المقاله دي هنتكلم في كام نقطة بسيطه

١_ هنعرف سوا يعني ايه اكتئاب

٢_ هنعرف اسبايه ايه؟

٣_ أعراضه ايه؟

٤ _ هنعرف ازاي نتعالج منه لو إحنا لسه في مراحل مش محتاجه لدكتور بعد الشر.

أولاً : تعريف الإكتئاب :

الاكتئاب حبايبي هو عباره عن أضطراب في المزاج بيخلي الشخص دايما حاسس بحزن واوقات شعور بالذنب ودايما شايف نفسه قليل وثقته في نفسه شبه معدومه بيكون الشخص فاقد اي احساس بالمتعة فاقد للشغف حتي لأكتر الحاجات اللي بيحبها زي مواهبه مثلا ومش حابب انه يشوف حد او يكلم حد حتي أقرب الناس ليه

الاكتئاب ليه أنواع كتير جدا مش هتكلم عنها بالتفصيل بس هكتفي اني اذكر أشهر انواع للاكتئاب.

١_ اكتئاب جزئي

٢_ اكتئاب مابعد الولاده

٣_ اكتئاب موسمي

ثانياً : أسباب الأكتئاب :

في سبب من أسبابه بيقولو أنه في نوع من أنواع الأكتئاب بيكون وراثي بس أشهر اسباب الأكتئاب بتكون بسبب الشخص نفسه أنه مثلا طول الوقت هو شخص قلقان أو أنه شخص بيعاني من قله ثقته في نفسه ومن أقل كلمه حد بيقولها بيضايق وينعزل ومايبقاش حابب يتكلم مع حد تاني

وبما أننا جبنا سيره العزله لازم نقول أن هي كمان سبب من أسباب الأكتئاب التاريخ بيقولنا أن الإنسان كائن مدني بطبعه اتخلق عشان يعيش وسط ناس شبهه ويتعامل معاهم وبمجرد مابينعزل او يقعد فتره مش بيشوف ناس بيكتئب جدا لأنه مش بيمارس طبيعته اللي اتخلق عشانها

وطبعا العزله بتودينا لسبب تاني من أسباب الاكتئاب وهي إن كل ما الإنسان بينفرد بنفسه بيقعد يحاسب نفسه علي كل صغيره وكبيرة حصلت في حياته ولو من ١٠٠ سنة وبيفضل طول الوقت يلوم في نفسه علي حاجات عدت وخلصت!!

في حاجات تاني من أسباب الاكتئاب مش بحس أن الإنسان بيكون سبب كبير فيها بيكون مافي اليد حيله ليها لكن هنحاول نقول حلول ليها أن شاء الله منها أن مثلا الشخص يقع في مشكله ومش عارف يخرج منها أو مطوله معاه شويه أو بعد الشر يصاب بمرض خطير زي السرطان أو وفاه حد عزيز عليه وقريب منه.

وماتنساش أن الحياه والصعوبات اللي فيها وضغط الشغل أو الدراسه أو أي عامل ضغط بتتعرضله بيكون أوقات من أسباب الاكتئاب.

ثالثاً : اعراض الاكتئاب :

خلينا متفقين أن الأعراض دايما بتختلف من شخص للتاني وده بيعتمد علي حده المرض ومده الاصابه ومرحلة المرض أوقات.

بس بشكل عام من اعراض المرض بيكون أن الشخص دايما حاسس بحزن مستمر حتي لو هو مش مبين ده ليك

دايما زي ماقولنا برضو وبشوف إن ده من اهم الأسباب هي عدم الثقه بالنفس والاحساس بالدونيه ودايما حاسس بالذنب وشعور اليأس مش بيفارقه ابدا وقولنا برضو أنه دايما فاقد الشغف لكل حاجه بيحبها.

المريض بيكون كمان فاقد للتركيز او عنده صعوبه انه يركز او ياخد قرارات

ونوصل لأكتر الأعراض خطوره وهي إن المريض يكون تفكيره دايما في الموت والانتحار

ودي اعراض نفسيه لكن بالنسبه للاعراض الجسدية بتكون ان المريض عندة صعوبه في انه ينام بليل او يصحي الصبح بدري وبينام كتير جدا ودايما حاسس بخمول ومش قادر يتحرك

أوقات بيكون مالوش نفس للأكل او بياكل زياده عن اللزوم دايما حاسس بصداع والالم في العضلات من غير سبب واضح.

رابعاً : علاج الاكتئاب :

في مرحله بيوصلها المريض بيكون محتاج لدكتور مش مجرد يشوف مقال زي دي واحب أقول أن دي مش حاجه غلط أو عيب إني اروح اتعالج من الاكتئاب!

طب أمتي المفروض أروح للدكتور؟

في كام حاجه لو حاصله معايا بسبب الاكتئاب فكده أنا لازم أزور الدكتور وفي أقرب فرصة ممكنه

زي مثلا أني بقالي فتره طويله في الاكتئاب بواجه أعراضه بقالي وقت طويل لأكتر من اسبوعين

أو مثلا بسبب الاكتئاب ومزاجي الوحش طول الوقت ده بدأ يأثر علي حياتي العاديه وعلي علاقاتي الاجتماعية وعلاقتي بالناس اللي حوليا

وأهم نقطة هي لو بدأ التفكير في الانتحار او إيذاء النفس بأي شكل كان.

نيجي بقي نتكلم لو أنا لسه في البداية أو بشكل عام ازاي احاول احمي نفسي من الأكتئاب.

في كذا حاجه ممكن نعملها تطلعنا من أي مود وحش ممكن يقلب بالاكتئاب

علماء النفس والدكاترة بينصحو دايما أن يكون في نشاط بدني مش لازم تمارس الرياضة بشكل عام ممكن نكتفي بأننا نمشي لساعة في اليوم

بيقولو كمان أن مجرد ما الإنسان يسمع صوت حد بيحبه بيتبسط فحاول انك تقسم يومك مابين عيلتك وأصحابك وبلاش تكون معزول زي ماقولنا في البداية

أملي يومك بحاجات كتير وبلاش الفراغ عشان اللي قال الفراغ قاتل ماكذبش!

كمان نصيحيه مني ليك لما تلاقي موقف حصل ضايقك ومش قادر تعديه ومخليك زعلان جدا حاول تكتبه سواء في ورقه وتقطعها او علي الموبيل المهم تكتب لان الكتابه هتساعدك تفرغ المشاعر السلبية اللي عندك وتحسن مودك

ممكن كمان تعمل او تطلب اكله حلوه وتاكلها وأنت بتسمع مسلسلك أو فلمك المفضل

في سبب من اسباب الاكتئاب زي ماقولنا مثلا مشكله وقعت فيها وهتطول عقبال ماتتحل حاول انك ماتفكرش فيها كتير يعني لو هي مشكلة في الشغل حاول انك اول ماتطلع من الشغل تنساها كأنها مش موجوده اصلا لانه عاجل ام اجل هي هتتحل هيجيلها وقت وتتحل فمتفكرش فيها كتير وتوقف عليها حياتك

ولو حصل وربنا ابتلاك بمرض حاول انك تقول الحمد لله طول الوقت وتكون متأكد أن ربنا قاصده خير حتي لو أنت بتتألم دلوقتي بس المستقبل خير حاول تفكر بطريقة اجابيه طول فتره مرضك

لو فقدت حد عزيز عليك فدي أصعب حاجه في الدنيا فعلا انا معاك كل اللي اقدر انصحك بيه هنا انك تشارك مشاعرك مع ناس تاني مشتركه بينك وبين الفقيد وزي ماانت مضايق هما كمان مضايقين علي فقدانهم ليه ده هيخفف شويه من حزنكو وهيساعدكو تعدو الاحاسيس دي

❤ خليك دايما فاكر أن الأكتئاب مش حاجه غلط فماتتكسفش أبدا تتعالج وحط في بالك كمان انه فتره وهتعدي زي ما كل حاجه بتعدي وأنه مجرد مرحله .

.