أكتر حد بحبه في حياتي هو الحد اللي يساعدني ارجع ثقتي بنفسي تاني بعد ماعدي عليا مليون موقف ومليون شخص ضيعوها... قعدت فتره طويله ومش هكون ببالغ لو قولت قعدت حياتى كلها ثقتي في نفسي مهزوزه وشبه مش موجوده أصلا لحد من فتره قريبة جدا أقدر أقول إن ثقتي في نفسي رجعتلي لدرجة أنها بدأت تقلب لغرور مش بس ثقة في النفس :'D
الكلام اللي هقوله في المقال ده هو حقيقي نقطه في بحر في موضوع الثقة في النفس ولو قعدنا شهرين نتكلم عن الثقة في النفس مش هنخلص بس عشان انا بتكلم من واقع تجربتي الشخصية هختصرلكو في كام نقطة كل اللي عملته واللي خلاني أقدر أرجع ثقتي في نفسي تاني.
عامه خلينا متفقين أن الواحد لما بيكون واثق في نفسه الدنيا نوعاً ما بتضحكله وبيكون إيجابي اكتر.
وكمان الثقه بالنفس مالهاش اي علاقه بشكلك من بره عامل ازاي الثقه بالنفس بتيجي من جوه ولما تكون واثق في نفسك الناس كلها هتكون شيفاك احسن واحد في اي حاجة بتعملها
ممكن تكون واثق في نفسك لمليون سبب واثق في نفسك عشان شغلك محدش بيعرف يعمله غيرك عشان شاطر في الطبخ عشان بتعرف ترسم كويس عشان بتعرف تساعد الناس طول الوقت وتكون موجود عشانهم الثقه بالنفس ليها تفرعات كتير اوي مالهاش اي دخل بشكلك من بره
الشخص الواثق من نفسه دايما بيعمل اي حاجه هو شايفها صح وواثق في قدراته فيها حتي لو كل اللي حواليه مش موافقين عليها وبكل سهوله بيقدر يعترف بغلطه ويستفاد منه بعد كده.
اكتشفت مؤخراً أن الثقة في النفس حاجه سهل جدا توصلها وانت قاعد علي الكنبه بتشرب كوبايه شاي لأنها ببساطه جدا بتبدأ من جواك بمجرد ماتغير كام حاجه بسيطه في طريقة تفكيرك ونظرتك لنفسك.
❤_ازاي اكون حد واثق من نفسه؟
1_ شوف الحاجات اللي حققتها طول حياتك وافتخر بيها
سهل جدا أكون حد مش واثق في نفسه لاني طول الوقت شايف اني محققتش حاجه مفيده معملتش اي حاجه تذكر في حياتي... هات ورقة وقلم وأكتب كل حاجه أنت شاطر فيها حتي لو بسيطة زي مثلا هتكتب أنا حد شاطر في الطبخ جدا وقدرت أتقن أكتر اكله بحبها واعملها بنفسي أو مثلا أنا حد شاطر في علاقاتي وعندي أصحاب حلوين أو إنك مثلا شوفت لوحة عجبتك وعرفت ترسم وحده زيها وكل ماتحقق إنجاز بسيط كده أكتبه في القايمة دي وكل ماتحس إنك ثقتك في نفسك قلت هات القايمة دي واقراها.
2_ شجع نفسك.
شجع نفسك دايما وقول لنفسك كلام ايجابي طول الوقت كل ماتعمل حاجه بسيطه قول لنفسك برافو لو مثلا أنت زيي حد عنده فوبيا من كلام في التليفون جرب لما ترد علي مكالمه او أتنين في اليوم تيجي اخر اليوم وتقول أنا انهارده عملت إنجاز مهم ورديت علي مكالمتين ولما تلاقي نفسك بتقول طب ما كل الناس بتعمل كده قول اه كل الناس بتعمل كده بس أنا ماكنتش بعمل كده وده إنجاز بالنسبالي أنا فخور بيه ومبسوط.
3_ حدد هدفك.
حط خطة دايما ليومك مش بس لأسبوع أو لشهر لا حط خطة لليوم ده أول ماتصحي من نومك أو حتي قبل ماتنام وخلينا متفقين إنها مش هتكون خطة فيها أهداف تعجيزية لا هنحط حاجات بسيطة جدا عشان ننجزها زي مثلا إني أنا هخصص ساعه أعمل فيها رياضة لو أنت بتحب الرياضة أو أنا النهارده في شغل متأخر عليا هياخد مني ساعتين اخلصه فيهم فهخصص ساعتين واعمل فيهم الشغل ده أخر اليوم هتلاقي إنك عملت حاجه مفيده أو حاجه بتحبها حتي لو فيلم نفسك تشوفه من فتره وقررت تحدد وقت انهاردة تشوفه وفعلا عملت كده هتكون مبسوط ومرتاح وحاسس بأنجاز
4_أقبل عيوبك.
أقبل عيوبك عشان تقدر تتمتع بمميزاتك.
يعني إيه الكلام ده يعني دايما خليك قابل عينك الضيقة اللي بتتقفل وقت ضحكتك ومش كل ماحد يجي يقولك أن لون عينك حلو تقول وده هيفرق في إيه مهي كده كده ضيقة ومش باينه للدرجة لا خليك واثق انها حلوه حتي وهي ضيقة كده
_أتكلم عن نفسك كتير.
أتكلم عن نفسك مع نفسك أقنع نفسك قد أيه أنت حد حلو جداً وحد مميز وقوي وبعدها اتكلم قدام الناس مش بغرور ولا فخر بس دايما خلي اللي قدامك يشوف قد إيه أنت شايف نفسك كويس ومميز وقتها هو كمان هيشوفك كده دايماً قولي أنا قوية وعارفة نفسي كويس جدا مينفعش حد يشكك فمنظوري عن نفسي ووقتها فعلا محدش هيقدر يشكك في أنك حد قوي.
6_ إختار الناس اللي حواليك صح.
بالنسبه ليا شايفة إن دي أهم نقطة فيهم كلهم حقيقي لأن كل ماالناس اللي حواليك كانو ناس مريحة وخفيفة ومشجعة ده مش بس هيساعدك أنك تكون بترجع ثقتك في نفسك تاني ده هيخلي كل حياتك حلوه ومريحة كل مابنبعد عن الناس اللي كل كلامها تحطيم و إحباط كل ما بنعرف ننتج ونتطور أكتر كل مابندخل ناس مريحة في حياتنا كل مابنلاقي التشجيع والكلام الحلو اللي يفتح النفس علي الشغل والتطوير من النفس وكل ماتطور من نفسك كل مابتزيد ثقتك في نفسك أكتر
☺ _ الثقة في النفس مش حاجة سهله ولا حاجه صعبة ومش هتيجي في يوم وليلة بس ممكن تيجي في وقت قليل جداً لو حاولت تعمل الكام حاجه اللي قولنا عليها فوق وأهمهم أنك تقنع نفسك وعقلك إنك مش قليل وانك مميز حتي عيوبك مميزه وبتميزك وتخليك حد فريد من نوعة.
التسميات
علم النفس